Thungnuk tamo? Thungnuk dal tongmarokno swi phunukdi? B.A 4 th semester kokborok major paper:-Viii mark:-12

Ans:-Kokrwbaini dalbida bedekni bisingo thungnuk wngkha kaisa belaikhe nangkukmani. Thungnuk tamo hwn sana thangkhe puilano yaphang yarwngni kokno khuchai nailaithai. Thungnukno Ingraji kokbai 'Drama' hwno tei Bangla kokbai bono 'Natok' hwno tei Greek kokbai bono 'dram' hwnwi sinijago. Thungnukni kokmang wngkha khwlaimung/mwsamung khwlai phunukmung eba to,do/ to act. Thungnukno Sanskrit kokbai 'natya' hwnwi sinijago. Natyani kokmang wngkha sak kolmani eba sak kolmung mungsaswk sak kolwi phunukmungno hwno. Thungnuk wngkha kaisa kwcham laibuma, tongkhorni hoda rwkjak raida, Hodao wngwi tongmani mangpili akorokno mokolbai nukmano dangsao eba haya sakao kasaui mwsawi, rwchabwi, kabwi, mwnwiwi tei dalbidal mungsaswk khwlaiwi lukurokno phunugwi kha khamrwo, Kap rwo, mwnwi rwo, Kha thangsarwo, abohai rokno dangsao dadak sidak phunugwi rwmano hwno.

Thungnukni Bedek-Buprarok:-Kokrwbaini hayungo kwbangma elem kwrwng tei swi kwrwngrok thungnukno dalbidal bedek buprani bisingtwi mwsai phunukjakmarokno khagwi phunuklangkha.. Aborokni mung thigwi khamao bathongkhe swiphunukjakha

1.Solsoi Phunukmung:-Realistic eba soisoi thungnuk wngkha thungnuk mwsamungo baithang nukmani kubui kubuikhai patimungno nainai lukurokni bwskango phang-phang eba dadak-sidakhai phunukjakmani, aro mungsa tatal phunukjakmung kwrwi joto nangmani manwi-khwnwirokno soisoi khe phunukjakmano hwno Realistic Drama.

II. Mari Phunukmung:-Mari eba Symbolic wngkha thungnuk mwsaphuru mungsaswk khwlaimungno mari eba symbolic phunugwi lukurokno phunukjakmani eba kubui-kubui manwi-khwnwi tongna nangmani, je manwi tongna nangmani Dalbidal mwnwi-khwnwi samungo phwnangjakmani-Buphang-waphang, nok wamung, chamung-nwngmung aborok bebakno soisoi kwrwiphano sakmangno samungo phwnangwi thungnuk mwsajakmano hwno mari eba symbol.

III. Khakhamung:-Khakhamung eba Tragedy wngkha Greek hani bisingtwi, Tregedy kokthai Greek Tragos' ni naharjakha. Khakhamung wngkha jesaphuruphano kaklaima, kwmalaima, thwilaima, akorokni bisingtwi puilao tongthok-chathok, mwnwikothok akorokbai tongphano paithago khakhamungni bisingtwi paikhal abono khakhamung (Tragedy) thungnuk hwnjago.IV. Mwnwi Kothok

Mwnwi kothok eba comedrni yaphang yarwng wngkha Greek hani bisingtwi comedy kokthai 'komos' ni nharjakha. Mwnwi kothok wngkha thungnuk mwsamungo eba patimungo puila nukmungni bisingtwi dalbidal jwngjal, eba kebengmung, naselermung, sejalaimung, khakhamung tongphano paithago tongthok-chathokni bisingtwi paikhe abono mwnwikothok (Comedy) hwnjago.

V. Khakhamung-Mwnwikothok:

Khakhamung-Mwnwikothok eba Tragedy-Comedy-nibo Greek hani bisingtwi achaio. Thungnuk mwsamung eba patimung Khakhamung tei mwnwikothok juda judakhai goron rwmani karwibo thansakhe goron rwmani nukjago. Kokthaisabai sana. thangkhe thungnuk mwsamungo tumung khakhamung-mwnwikothok dalokjak patimung tongkhai abono khakhamung-mwnwikothok thungnuk hwnjago.

VI. Rwchapmung Thungnuk

Thungnuk mwsamungo khakhamung tei mwnwikothok tongmarok mwsamungni bisingtwi khwlai phunukma haino rwchapmungni bisingtwibolukurokno phunukjagwi tongo. Rwchapmungni bisingtwi hodani tonggwrwng, Hodao wngwi tongmani mangpili, khakhamung, khanangmung, kha samung tongthokmung akorok phunukjago. Rwchapmungni bisingtwi mungsaya mungsa phunugwi rwjakmanino hwno Rwchapmung thungnuk.

VII. Hoda Rwkjak thungnuk: Hoda rwkjak thungnuk wngkha hodani tongmung-chamung, hukumu-mukumu, mwsamung-rwchapmung, joto wngwi tongmarokno jai jaikhe eba swrai swraikhe jotono hodano rwgwi phunukjakmano hwno.

VIII. Lengaimung Thungnuc Lengaimung eba Heumourous thungnuk wngkha

mwsamungno kaisa kaisa mwnwikothok thwngrwngni bisingtwi lukurokno kha swlagwi tongthokmung rwnai lengaijagwi phunukmani mwsamungno hwno.

Palthak: Thungnuk wngkha kaisa kothomano rwgwi mwsai phunukmani eba khakhamung, khanangmung, mwnwikothok, hamjaklaimung akorok joto dangchao khwlai phunukjakmano hwno. Thungnuk kwbangmano dal wngwi mano keboba hodano rwgwi, thwngkwrwng, Hapharno rwgwi, hano rwgwi, rwchapmung, mwnwikothok, khakhamung obohai rokno twiwi janija wansokmatwi swilaimani nukjago.. 

 🙏totoykokborok.blogger.com no norok Follow khai baidi kisa🙏