Kokborokni umor bwswk wngwiman kok kisabai swidi? B.A 1st semester kokborok major paper:-1

Ans:- Kokborok Tiprasa dophani amani kok. Saimanhorya jorani simino o kok Tiprasa dophani khukbai khugo sajagwi phaio. Phiya kokborokni umor bwswk omono twiwi soikhe saimanai kwrwi phano koksoisimung kwrwngrok laibumano rwgwi cherwi naitugwi naiphilwi naimani bisingtwi saimankha Kokborok kokni umor 1200-1400 bisi wngwimano.

**Kokborok kokbai Chinese kokni achaiphangno rwgwi kokbuma:--
Koksoisimung kwrwngrokni elembakni rwtwk rwkmungno eba naiphilmano rwgwi kokborokno umor chongnani swkang Chinese kokbai Kokborok kokni yaphangmari rutukthai kwlaio. Koksoisimung kwrwngrokni wansukmatwi hayungo 7000 (snisai) wngtwtwi koktongwimano. O kok bosongo 12-13 hai khwlaiwi khagwi phunukjakkha. Kok soisimungkwrwng Suniti Kumar Chattapadhay-ni simi Grierson bebakno Tibetan Chinese eba Sino-Tibetan-ni bodo kok bosongo Kokborok kok khopjago hinwi salangkha.

Soisimung kwrwng Tarapurwala Chinese kokno 5000 bisi kwcham hinwi bini swijak "Elements of the Science of Languages" bijabo khursawi salangkha. Koksoisimung kwrwng Dr. Sukumar Sen swilangkha- "Chin kok hayungni jotoni swlai kotorkuk. Chin kokni jotoni kwchamkuk bumul Jisu Khristo achaimani 2000 bisi swkangni kaisa-kwnwio mukumu-swijak kwchamo manjakkha." Chinese kok Kokborok kokni yaphang, aboni bagwino kokborokni bisi Chinese kokbai baksa baksa hinwi romwi naharwimano.

**Kailash Chandra Singha-ni Rajmala bijapno rwgwi kokbuma:--
Kailash Chandra Singha bini 'Rajmala' bijapni kwrwngsao sakha- bubagwra Sengtungpha ha pusimungni jorao bana tisajakkha tei Tipra bisi chengjakkha. Rajmala' bijapno rwgwi bini ha pusianing jora rabisi chinwi eba aboni kisa swkangdropse hinwimano. Phiya abono tabukni simi 800 bisi slk swkangni laibumase hinwimano. Tiprani bubagwra Ganga twimani salhap rukungo bana tisamani tei Tipra bisi chengjakmani kok bwkwraio kisaswkphano laibumani kok bubak tongkku hinmani abo tabukni simi 1400 bisi swkangni kok hinwi chongwi naharwimano. Oro khursathai kwlaio Tiprani bubagwra khoroksa tabukni simi 1400 bisi swkango uttur kacharni bwkhakno yakarwi tabukni Tipra hachuk mulugo happhaikha hinwi sawimankha.

**Glottochronology kok elembakno rwgwi kokbuma:--
Laibumano rwgwi romwi naharwimano Jisu Khristo achaimani 2000 bisi swkango Bodo, Dimasa, Kokborok, Garu, Mech akorog Assam-o phaiwi jora kolok romwi thansakhe tonglai phaikha.

Glottochronology kok elembakni bisingtwi kaisa tei kaisa kokni achaiphang eba umor romwi naharwimano. Abono twiwi America-ni koksoiswimung kwrwng H.A. Gleason jr. Bini mung gwnang "An introduction to Descriptive language" bijapni 450 laio swikha tumung songsa tei songsa bosongni kok 66% solaikhe romwimano kaisa kokbai teikaisa kok 1000 bisi swkang kaklaikha. Tei 44% solaikha hinkhe 2000 bisi swkang kaklaikha hinwi chongwi naharmano. Dimasa kokbai Kokborok kokni 55-60% solaikha hinkhe Glottochronology-no rwgwi naiwi saimankha 1200-1400 bisi swkangno Dimasa kokbai Kokborok kok kaklaikha. Tabuk Glottochronology elebakno rwgwi Kokborok kokni umor 1200-1400 bisi hinwi romwi naharjakkha.

Comments

Post a Comment

Popular posts from this blog

kokborok kokno kuchugo tisathani 1841ni simi1900 bisi jora tamo tamo samung tangjakha swidi? eba kokborok kokno kuchuk tisathani phater hani borokrog samung tanglangmano twi swidi tei kokborokno tamo hinoi mung pherlangkha swidi? Tei a bijabrogni mung tamo swidi? B.A 1st kokborok major paper:-ii

Ans:- kokborok kokno kuchugo tisana saktharwi phater hani borokrog jora kolokma romwino kuchugo tisana bagwi hamkwraini samung tanglangkha. Borogni khursawi swi kwlangjakmani bisingtwi kokborok kok kuchugo achuk thai mankha. Phiyaba o kokno twi elem kerwngrogni khursai kwlangmani bisingtwi kokborok kokno juda juda mung bai sinimung mankha.O kokborok kok hamkwraini bagwi  phater hani sahebrogni samung khwlailangmani tei bijab swi kwlangjakmano twi  khamaokhe swi phunukjakha----- *1841 bisini simi 1900 bisi jora kokborok swina chengjakma:-- ---------------------------------------------------------- Kokborok kok kuchuk Kasathai 1841 bisini simi kok sikwrwngrokni bisingtwi samung tangjakna chengkha. Abono twiwi tolao swi phunukjakkha-- 1).A Phayre:-An account of Arakan, journal of the Asiatic society pf Bengal. VOLX, 841,part-XI, page-711, A journalni kokbwkhalo bo kokborokni kokthairogno twiwi koklam khwlaijakha . Bo kokborono "Mrung" hinwi pharlangkha.  2).H.C Sutherland:-B...
Read more

Sino-Tibetan kokbosongni mungrem kaisa swnamdi ? A mung remo kokborok bo dokholo kwlai swidi? B. A 1st kokborok major paper :-ii

Image
Ans:-Hayungo bebagwi 6,500-6, 700(Doksaibara-Doksaisinira) ahai koktongo hinwi sawi manjakkha. Kok solaikwrwng elem khursanairogni bisingtwi saimanjakkha aswk kwbangni bising jotoi 5.0000(Basai) kokni simise sini mung manjak. Dr. Suniti kumar chottopadhai ni simi chengwi,Sir George Abraham Grearson akosong bebak kok soisimung kwrwng eba elem kwrwngrog kokborok kokno sino-Tibetan kokbosongo khobjago hinwi khursalaikha.  Kok soisikwrwng Dr.Satendra Narayan Gosami bini "Studies of Sino-Tibetan language" bijabo kokborok kokno sino-Tibetan kokbosongni bedek bupwrao kwlaio hinwi khursakha.Bo bini mung reo Sino-Tibetan kokbosongni deknwi khagwi phunukkha. Abo wngkha Tibeto-Burman tei siam-Chinese .Haikhe Tibetan-Burman ni simi bedek bupwra khakjagwi "Assam- Burmese -Bodo-Naga-Bodo-Tipra "phunukmari hinwi bini mung remno swrai- swraikhe phunugwi naijakha.  Dr. Satendra Narayan Goswami bai phunukjak sino-Tibetan kokbosongni mung remo kokborok bo dikholo kwlai abono khamao ph...
Read more

kokborok bai Dimasa kok sollaima tei pherlaima no yakumun phunugwi swidi? B.A 1st kokborok major paper :-ii

And:-kokborok bai Dimasa kokbosongni achaithai yaphangni kokbosong wngkha sino-Tibetan kokbosong. Kokborok kokni Bisingtwi jotoni swlai gana wngkha Bodo bai Dimasa. O kaitham kokni bisingo sollaiyani swlai sollaimani bangkugo. Kokborok bai Dimasa kokni Sollaimungno cherwi naithani cherwi nainairog obo haikhe ma wansokkha a kok kainwi kokni kokthai yarwng 50%yakhe 66%solaimung tongo. Aboni bagwino Glottochronologyni pohor bai omohai sollaimungno 1200-1400 bisini swkang Dimasani kokborok kagwi phaiwi tei kaisa kok khe sinijakkha hinwi sajakkha.  Kokborok bai Dimasa kokni bisingo kokthai. Khorang akorog solai tei pherlaimano khamao phunukmari ni Bisingtwi phunukjakha--- 1).Sollaimung kokthai:-        Kokborok                  Dimasa --------------------       -----------------     Ang                              ...
Read more