Sengkarak isiri

B.A 5th semester kokborok major paper:-11" Sengkarak isiri"

Bisi kobangma agini kok. Delhio aphuru Sultani amol cholioi tongo. Bangladeshbo Thuruksani yago thangkha. Chini ha i Tripurao aphuru ahaitui bokha kotor sengkarak buruima masa achaikha, jani kok tuioi chung i hani bosarok bolaimani mano. Bo rajani bihik - Tripura bubagra Sengthungphani Isiri Tripurasundari. Bini kokno tini norokno saoi khonaruwanu.
Aphuru Tripura raijo ganani Meherkulo Hirabanta Chodri mungoi rang gonang borok khoroksa tongo. Bo Gurni Nobabni thani Meherkulni Jomidar hinoi sonod manoi phaikha. Aboni bagoi bo bisi burum burum rungkungsa kuplung khlaioi kaham kaham manthaya manuirok Tripura raijo bisingni rutugui tilangoi Nobabno ruio. I kok khnaoi Tripura bubagra naichomrukha kukubui de manuirok Tripura raijonino tilangjak. Khobor mankha kubuino Tripuranino tilangjago. Jolijagoi raja soino rohoroi Meherkul luth khlairukha. Hirabanta kharoi thangoi nalis khlaikha Nobabni thani. Nobabno bujokkha, Nobabni manui segoi tilangnani kiriya, ahaitui borok satokjakyakhaile borokrok Nobabno sak nangyase ongbainai.
Nobab bo wansugoi sakha - "Au nung samani kok chao. Ahaitui borok sajai manayakhaile buibo boni tongmungno surungnai."
Nobab soinorokno Tripura phaising thangnani ades rukha. Hirabanta lama phunugoi tilangnani ongkha. Yang Nobabni soino phaio hinoi khobor manoi Tripura bubagra wanajakkha. Montrirok sakha - "Nobabni soino joboino kobang choba nangkhlai chung paiglak. Sondini kok rohormanino chao."
malaioi sakha Rajabo gosikha. I kok khnaoi Isiri jolijakkha. Rajabai "Obole toma kok khna nung choba khlaiglakphon? Osuk mung kotor sengkarak rajarokni bosongo achaioi choba kirinani lachiliyade nung? Tongdi khai buruirok hai khul luboi ri tagoi tongsidi. Ang thanganu chobao. Achaimani ha-no narukna manyakhai nogobo tai kiphilglak."
Senapotini phaising naharoi sakha - "Tamo norokbo de chobao thangnani kirijak? Kirijakyakhai ha-bumani mokhang naruknani samungo sabo thangnai phaidi ani loge."
Senapoti sakha "Ama, nung motaijukma, nungno chobao thango hinkhai chung de thangyaoi tong man? Chini siro ba Tiprani thui kurui de? Himdi ama ha-bumani samungo thuinani ongkhaibo nini samo bachaoino choba khlaoi thuiyanu."
Borokni kok khnaoi bokha tongthokjagoi Isiri doma burukha. Salnui salthamni bisingono jotto choba khlainairok tiyar ongoi rajakhoro sokphaikhai wak kotor kotor butharoi borokno charukha. Taini aichugo khai Isiri chobani richum kanoi mayung saka kasaoi choba khlainani lam rukha. Bihik burui borok ongoi chobao thango, chwla ongoi bosai Tripura bubagra de tai nogo tongoi mansi? Bobo tai masa mayung naoi utung utung thangoi bihikbai mililaikha. Aphurukhai soinorok kha-sarangjakmani sabo nug! Borokni chirokbaimani khnaoi Nobabni soinorok kha bising bising kirijakkha.
Chobani kok tai tamo sano dolsa choba khlaio ha bumani mokhang naruknani bagoi tai dolsa choba khlaio mulasengni bagoi. Mulasengni bagoi choba khlainairok de thui-thangnani wanayaoi choba khlainairokni sakango bachai Nobabn Dipor laikhlaikhai Nobabni soinorok tai tongoi manliya iyang uyang kharnani nangbaikha. Nobabni Senapoti bini oroi-poroi ongbainai soinorokno tai kuthumrunani manliya. Ulokhai bobo kharlangkha. Ahai khlaioino Tripurani Isiri-Tripurasundori sotoru soinorokno mechenoi ha-bumani mokhang chungruoi nogo kiphiloi phaio.
Norok taibo toroi itihas porikhai siwanu, itihaso i Isirini achukthai Jhansi ni Rani Lakshmibai, Gondwana ni Rani Durgavati, tai Bijapurni Rajani bihik Chand Sultana songbai homan. I choba khlainai Isirini yakni seng tabukbo tongo.

           (Kok Surungma, 1963)

Comments

Post a Comment

Popular posts from this blog

kokborok kokno kuchugo tisathani 1841ni simi1900 bisi jora tamo tamo samung tangjakha swidi? eba kokborok kokno kuchuk tisathani phater hani borokrog samung tanglangmano twi swidi tei kokborokno tamo hinoi mung pherlangkha swidi? Tei a bijabrogni mung tamo swidi? B.A 1st kokborok major paper:-ii

Ans:- kokborok kokno kuchugo tisana saktharwi phater hani borokrog jora kolokma romwino kuchugo tisana bagwi hamkwraini samung tanglangkha. Borogni khursawi swi kwlangjakmani bisingtwi kokborok kok kuchugo achuk thai mankha. Phiyaba o kokno twi elem kerwngrogni khursai kwlangmani bisingtwi kokborok kokno juda juda mung bai sinimung mankha.O kokborok kok hamkwraini bagwi  phater hani sahebrogni samung khwlailangmani tei bijab swi kwlangjakmano twi  khamaokhe swi phunukjakha----- *1841 bisini simi 1900 bisi jora kokborok swina chengjakma:-- ---------------------------------------------------------- Kokborok kok kuchuk Kasathai 1841 bisini simi kok sikwrwngrokni bisingtwi samung tangjakna chengkha. Abono twiwi tolao swi phunukjakkha-- 1).A Phayre:-An account of Arakan, journal of the Asiatic society pf Bengal. VOLX, 841,part-XI, page-711, A journalni kokbwkhalo bo kokborokni kokthairogno twiwi koklam khwlaijakha . Bo kokborono "Mrung" hinwi pharlangkha.  2).H.C Sutherland:-B...
Read more

Sino-Tibetan kokbosongni mungrem kaisa swnamdi ? A mung remo kokborok bo dokholo kwlai swidi? B. A 1st kokborok major paper :-ii

Image
Ans:-Hayungo bebagwi 6,500-6, 700(Doksaibara-Doksaisinira) ahai koktongo hinwi sawi manjakkha. Kok solaikwrwng elem khursanairogni bisingtwi saimanjakkha aswk kwbangni bising jotoi 5.0000(Basai) kokni simise sini mung manjak. Dr. Suniti kumar chottopadhai ni simi chengwi,Sir George Abraham Grearson akosong bebak kok soisimung kwrwng eba elem kwrwngrog kokborok kokno sino-Tibetan kokbosongo khobjago hinwi khursalaikha.  Kok soisikwrwng Dr.Satendra Narayan Gosami bini "Studies of Sino-Tibetan language" bijabo kokborok kokno sino-Tibetan kokbosongni bedek bupwrao kwlaio hinwi khursakha.Bo bini mung reo Sino-Tibetan kokbosongni deknwi khagwi phunukkha. Abo wngkha Tibeto-Burman tei siam-Chinese .Haikhe Tibetan-Burman ni simi bedek bupwra khakjagwi "Assam- Burmese -Bodo-Naga-Bodo-Tipra "phunukmari hinwi bini mung remno swrai- swraikhe phunugwi naijakha.  Dr. Satendra Narayan Goswami bai phunukjak sino-Tibetan kokbosongni mung remo kokborok bo dikholo kwlai abono khamao ph...
Read more

kokborok bai Dimasa kok sollaima tei pherlaima no yakumun phunugwi swidi? B.A 1st kokborok major paper :-ii

And:-kokborok bai Dimasa kokbosongni achaithai yaphangni kokbosong wngkha sino-Tibetan kokbosong. Kokborok kokni Bisingtwi jotoni swlai gana wngkha Bodo bai Dimasa. O kaitham kokni bisingo sollaiyani swlai sollaimani bangkugo. Kokborok bai Dimasa kokni Sollaimungno cherwi naithani cherwi nainairog obo haikhe ma wansokkha a kok kainwi kokni kokthai yarwng 50%yakhe 66%solaimung tongo. Aboni bagwino Glottochronologyni pohor bai omohai sollaimungno 1200-1400 bisini swkang Dimasani kokborok kagwi phaiwi tei kaisa kok khe sinijakkha hinwi sajakkha.  Kokborok bai Dimasa kokni bisingo kokthai. Khorang akorog solai tei pherlaimano khamao phunukmari ni Bisingtwi phunukjakha--- 1).Sollaimung kokthai:-        Kokborok                  Dimasa --------------------       -----------------     Ang                              ...
Read more